Sega tipik ek patrimwann morisien
Sega tipik: enn ritm ki gard nou memwar vivan
Mo finn retrouv sa video UNESCO lor sega tipik, ek mo kontan fason li montre keksoz ki parfwa nou pran kouma normal: ravann, lavwa an Kreol, mouvman lekor ek sa lelan kolektif ki fer dimounn zwenn dan mem ritm. Pena tro boukou keksoz pou azoute kan mizik li pe koz limem.
Plis ki enn dans Sega tipik finn rekonet par UNESCO an 2014 kouma enn patrimwann kiltirel imateryel. Pou mwa, so valer pa zis dan lexpresion “tradision”. Li dan bann zenerasion ki transmet li, dan bann lavwa ki rakont lavi, ek dan lefet ki li ankor kapav gagn so plas dan bann program kiltirel zordi, pa zis dan enn vitrin.
Kan nou ekout li Mo krwar li vo lapenn get sa video-la dousman, mem si to deza konn sega. Get bann detay lor ravann ek lor fason bann dimounn reazir ansem. Ena sertin ritm ki fer nou rapel ki patrimwann pa enn keksoz bloke dan lepase. Li bouze avek nou.